Bihar inauguratuko dute kultura etxean egin duten gaztelekua

Bihar, irailak 19, inauguratuko dute Atxagazte gaztelekuaren egoitza berria. Iralabarri plazatik Arkupe kultura etxera ekarri dute, eta han elkartuko dira 12 eta 16 urte arteko gaztetxoak. Ate irekiak egiten dabiltza egunotan gaztelekua ezagutzeko; gaur, 17:00etatik 19:00etara dago zabalik.

Kultura etxean izan arren egoitza, Arkupera sartu barik zuzenean gaztelekura sartzeko atea dauka. Eta barruan hainbat gela dituzte gazteek: harrera eta sukaldea goiko solairuan, eta topagunea eta musika lokalak behean. Gainera, gazteria teknikari den Maider Etxanizek bertan dauka bulegoa. Astelehen eta eguazten guztietan egoten da eta egubakoitz batzuetan.

Iraileko egitaraua

Inauguratze ekitaldia 17:00etatik 20:00etara bitartean izango da gaur, eta hainbat eskulan egingo dituzte: tatuajeak, graffitiak, txapak, musika tailerra… Eta gaztelekuaren ibilbide berria ondo hasteko kontzertua eskainiko du Bergarako Azkaiter Pelox bakarlariak (19:00).
Behin inauguratuta zabalik egongo da Atxagazte. Bihar, zapatua, zirko tailerra egingo dute: malabarrekin jolasten ikasi, hankapaloen gainean ibili… Eta domekan fimo tailerra izango dute, fimo orearekin bitxiak zela egin ikasteko.

Hurrengo aste bukaeran San Migel jaiak ospatuko ditugu herrian eta zapatuan itxita egongo da. Domekan, irailak 28, ostera, sukaldean jardungo dute gazteek eta ondoren merienda egin.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.