Luis Otadui eta Jesus Osinaga izan ziren idatzia aurkeztu zutenak udalbatzaren aurrean, gainerako jabeak ordezkatzen zituztela. 2005eko martxoan erabaki zuten komisio bat sortzea lanei jarraipena egiteko baina ez duela funtzionatu esan zuten. Bidegirekin hainbat aldiz elkartu direla jakinarazi zuten konponketa lanak bideratzeko "baina jarritako epeak ez dituzte betetzen". "Ezintasun" horren aurrean babesa eskatu zioten udalbatzari eta behar den erakundeetan kalteak jasandakoen eskaerak defendatzeko.
Enpresaren berririk ez
Alkateak jakinarazi zuen Bidegi eta Udalaren arteko harremana ona dela eta asmoa ez dela haren aurka egitea, aretxabaletarren interesak defendatzea baizik. EAJko Arritxu Olidenek gaineratu zuen, Bidegiko Borja Jauregirekin egin zuela berba eta arazoa dela konponketa lanak egin behar zuen enpresaren berririk ez dutela. Neurriak hartuko dituztela esan zion Jauregik eta lanak behar bezala bukatu. Aho batez onartu zuen udalbatzak lur jabeen interesak babestea.