Diru kontuei dagokienez larritzeko arrazoirik ez dagoela jakinarazi zuten, baina Udalak esandakoa baino diru gutxiago eman duela, 3.300 euro hain zuzen. Ekitaldi asko antolatu zituztela iaz gogorarazi zuten, berrikuntzen artean kantu txapelketa, eta pozik azaldu ziren egindakoekin.
Bestalde, aurten abian jarri gura dituzten egitasmoen berri eman zuten, tartean honakoak: eztabaida taldeak, bazkideei eragiten dieten gaien gainean jarduteko; ekitaldi berrietarako taldeak, perretxikoen gainekoa, esaterako; karta eta mahai joko txapelketak; eta kantu taldea finkatzea, herrian ekitaldiak eskaintzeko.
Gainera, zuzendaritza batzordea berrituko dute egunotan; taldea utziko dute presidente den Imanol Arantzabalek eta Javier Sanzek. Eta sartuko diren kide berriak hauek dira: Jesus Osinaga, Markeliñe Mendieta eta Jabier Urtzelai. Ardurak banatzeko batzarra eguenean, hilak 18, egingo dute.
Bidaiarako oraindik lekua
Bestalde, gogorarazi dute apirilean Andaluziara egin gura duten bidaiarako oraindik lekua dagoela. Dagoeneko 41 lagunek eman du izena eta beste hainbatendako dago lekua. Horretarako gaur eta bihar pasatu behar da Basotxoko bulegotik (11:00-12:00).