Garagartza auzotik bueltan egingo duten Arrasateko saihesbidearen lanak egiten dabiltza. Hain zuzen, GI-3920 errepide gainaldean beste bide bat zabaltzen dabiltza hondeatze-makinak erabilita; bide hori, saihesbide berriaren iparraldean geratuko diren lursailetara joateko izango da. Semaforoak zenbat denboran egon beharko duen ez dakite Udal arduradunek; hortaz, pazientzia eskatzen diete gidariei.
Errepidea garbitzen
Errepide estua da –orain estuagoa autobideko zubiaren euskarriak daudelako– eta gainera, ur asko pilatzen da euria egiten duenean. Hori horrela, auto gidariak kexu dira azken hilabeteotan eta Udalak behin eta berriro eskatu dio Aldundiko Errepide Sailari konponbideren bat emateko uraren kontuari.
Joan zen egubakoitzean hain zuzen ibili ziren hainbat langile errepide
bazterrak txukuntzen eta uraren hodia garbitzen. Hodi horrek ura
jasotzen du errepidearen alde batean–autobideko lanengatik pilatuta
dauden lurretatik datorren ura– eta beste aldean dagoen ibaira eroaten
du. Baina sarritan ura hoditik pasatu beharrean errepide gainetik
joaten da, eta hori arriskutsua da automobilendako putzu handiak
sortzen direlako eta hotz eginez gero izotz zatiak sor daitezkeelako.
Garbiketa lanak lehen ere egin zituzten, baina behin betiko
konponbiderik ez diotela ematen arazoari diote Udaleko hirigintza
saileko ordezkariek.
Aldundiak bere aldetik adierazi du kutxeta berria jarriko dutela errepidean urak xurgatu eta putzurik sor ez dadin.