Biribilgunea egitearen arrazoia da errepidea egingo dutela Garagartza auzotik aipatutako elkargunera, GI-2620 Arrasateko saihesbide berria izango da hain zuzen. Hala, Aramaio-Santa Ageda-Garagartza errepidea zuzenean lotuko dute Arrasate-Aretxabaleta saihesbidearekin, Arrasate erditik pasatu barik. Izan ere, Garagartzan dauden lantegi eta industrialdeetako langileen txanda aldaketek hainbat zirkulazio arazo sortzen ditu, eta uste dute errepide berri horrek arindu egingo duela autoen joan etorria.
Bi mailako biribilgunea
Aldundiko Bide Azpiegiturak departamentuak egindako proiektua aztertu du Aretxabaletako Udalak, eta iradokizuna aurkeztea erabaki du. Proposatu dio biribilgunea bi mailatan egitea zirkulazioa hobeto bideratzeko. Hala, Garagartza-Bergara-Donostia ibilbidea egingo duten automobilek eta Garagartza-Eskoriatza-Gasteiz egingo dutenek goiko mailan egindako errepideari jarraituko liokete zuzenean saihesbidera; eta Arrasate eta Aretxabaleta arteko zirkulazioak eta tranbiak, gaur egun dagoen bidetik jarraituko lukete.
Aldundiak aurreikusi duen proiektuak aurrera eginez gero tranbiarendako pasua egin beharko litzatekeela biribilgunean adierazi digute Udaleko Hirigintza saileko arduradunek: "Eta semaforoak jarri beharko lituzkete".
Desjabetzeak egiten
Biribilgunearen proiektua eginda daukate Bide Azpiegiturak departamentuan, eta desjabetzeak egiten dabiltza orain. Horregatik inguru horretan lurrak dituen aretxabaletar batek ere alegazioa jarri dio proiektuari. Hirigintza saileko arduradunek uste dute urtea bukatu aurretik esleitu gurako dituela lanak Aldundiak.