Azalean albistegia dauka, kultura etxearekin zerikusia duten albiste aipagarrienekin. Argazki galerian, berriz, Arkupen izandako edo handik gutxira egongo diren ikuskizunekin lotutako irudiak ikusi ahal izango dira. Gainera, hilero gertatzen den kultura egitaraua PDF formatuan jaisteko aukera ere ematen du.
Eduki finkoak
Horretaz aparte, eduki finkoak ere baditu webgune berriak. Arkupek eskaintzen dituen zerbitzuen gaineko informazioa dago eta baita kultura etxearekin harremanetan jartzeko formularioa ere. Hainbat webgune interesgarritara zuzenean sartzea ere ahalbidetzen du; hala nola, Aretxabaletako Udalera, Atxagaztera, Gipuzkoako Diputaziora eta Jaurlaritzako Euskadiko Liburutegien Sistema Nazionalen webgunera.
Agerraldian parte hartu zutenek azaldu zuten Arkupek sorreratik "garbi" izan duela teknologia berriekin bat egin gura duela, horiek eskaintzen dituzten abantailak aprobetxatzeko. Adibide moduan, telefono mugikorretara Arkuperen programazioa jaisteko jarritako bluetooth emisorea aipatu zuten. Webgunea Arkuperen irudia eta eskaintza zabalduko duen "euskarri dinamikoa" izatea bilatzen duela gaineratu zuten.