Aretxabaletan hasi dira Eibar-Gasteiz autobidearen lanek eragindako kalteak konpontzen

Aretxabaletako Udalak Eibar–Gasteiz autobidearen eraikuntzak sortutako kalteak konpontzeko lanak hasi ditu. AP-1 autobidea egiteko apurtutako zelai eta errepideak konpontzea Bidegiren ardura da, baina, Udalarekin sinatutako akordio baten ondorioz Udalaren esku geratu dira zenbait konponketa.

Oraindik ere, Eibar-Gasteiz autobidearen lanek eragindako kalteak konpontzeko daude Aretxabaletan. Baina, Udalak hainbat puntutan ekin die lanei.
Zehazki esateko, Apotzaetxebarri eta Izurieta auzoetako guneetan hasi ditu berreskuratze lanak: Ametzagako bidea; Izurieta iparraldeko lanak; Apotzagaetxebarriko Salluente ermitara doan bidea eta ondoan egindako maldak; eta Egileor baserri osteko bidea dira konpontzen hasitako lekuak, Hirigintza Saileko arduradunek jakinarazi dutenez.

Berez, Bidegiren ardura da kalte horiek konpontzea baina Udalak eta Bidegik sinatutako akordio baten ondorioz, hainbat lekutan, Udalak dihardu esan moduan, horiek konpontzen.
Lanik garrantzitsuenak, baina, Bidegiren eskuetan daude. Batetik, Aretxabaletatik Aramaiora doan GI-3920 errepide zatia eta bestetik, Izurieta auzora doan GI-3132 errepidearen bide zorua.

Udaleko Hirigintza Saileko ordezkariek ez dakite Bidegik noiz hasiko dituen lanak. Esleituta daude eta itxura guztien arabera laster hasiko dituzte, izan ere, Izurietako bidea markatzen ibili dira.
 

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.