Dantzari talde batek kuartel zaharretik irtengo du trikitilariak lagun dituela eta beste talde bat Iralabarri plazatik etorriko da txistulariekin (18:30). Herriko Plazan elkartuko dira guztiak eta bertan izango dute zain musika eskolako gaztetxoen banda (18:45). Aratuste jaiak ardatz hartuta dantzak, kantuak eta musika tartekatuko dituzte eta parte-hartzaile guztiak txatxo mozorrotuta egongo dira –Lantzeko Inauterietako pertsonaia, kolore biziko txapela eta arropak daroana–. Ekitaldia behar bezala ikusteko gurasoen laguntza izango dute eta asmoa da korru handi bat egitea plazan, zuziak eta kriseiluak eskuan dituztela.
200 neska-mutiko
Lehenengoz antolatu du musika eskolak Aratuste Jaialdia. Mariatxen Urkia zuzendariaren esanetan arrazoia da ikasturtean zehar beste ekitaldi bat egitea ikasleekin –Gabonetan eta ekainean egiten duten legez–, eta era berean, herria girotzea Aratusteei begira. Guztira 200 bat neska-mutikok jardungo dute jaialdian eta hainbat entsegu egin dituzte azken asteotan. Hori guztiori herritarrei erakusteko eguraldiaren laguntza behar dute orain.