Mitarte kalea berritzeko obretarako eskaintzak bihar arte (martitzena) aurkez daitezke. Kale horretan hornidura eta saneamendu berriak jarriko dituzte. Argiteria, hiri-altzariak, seinaleztapen-sistema eta lorategiak ere aldatuko dituzte eta galtzadan harria jarriko dute.
Horretarako 793.916,47 euro bideratuko dituzte. Jasotako eskaintzak aztertu ondoren, martxoaren 30erako aurreikusita dagoen osoko bilkuran esleituko dituzte. Lan horiek apirilean hastekoak dira.
Aozaratzako bidegorria
Bestalde, Aozaratza auzoko bidegorria egiteko eskaeren aurkezpena hurrengo egunean (martxoak 18) amaituko da. Lizitazio oinarrien aurrekontua 311.540,78 euro da eta bidea egiteko epea bost hilabetekoa izatea aurreikusi du Udalak. Interesatuek udaletxean aurkeztu behar dute eskatutako dokumentazioa.
Kasu horretan, Udalak ez du argitaratu lehiaketa deirik Gipuzkoako Aldizkari Ofizialean, nahiago izan duelako inguruko enpresei obra horiek eskaintzea. Proposamen guztiak jaso ostean egokiena zein den aztertzeari ekingo dio.