Ekimenak hainbat helburu ditu, hala nola Basotxoko bazkideei protagonista izateko aukera ematea; leku eta giza talde ezberdinetako kultura espresioak mahai gainean jartzea; nagusi guztiek dituztela intereseko altxorrak erakustea; eta altxor horiek jasota uztea.
Estiloa eta gaia, libreak
Basotxoko bazkide bakoitzak gura beste lan aurkez ditzake. Hori bai, gurasoengandik edo aitaita-amamengandik ikasitakoak izan beharko dute guztiek –aurreko belaunaldikoengandik jasoak–. Estiloak eta gaiak ez dute garrantzirik, ezta hizkuntzak ere, gurasoek erakutsitako modua errespetatuko da. Bai kantuak, bai narrazioak grabatu egingo dituzte antolatzaileek eta idatziz ere aurkeztu beharko dira lanok.
Adituak eta epaimahai herrikoia
Bi epaimahai osatuko dituzte: batetik, aditu taldea egongo da, bai musikan adituak, bai herri kulturgintzan; eta bestetik, lehiaketan parte hartutako guztiek osatuko duten epaimahai herrikoia. Adituek egindako txostena jasoko du epaimahai herrikoi horrek eta azken erabakia berea izango da. Hori bai, guztiek hartuko dituzte kontuan honakoak: lanaren antzinatasuna; ez izatea oso ezaguna edo galtzeko zorian egotea; herriko arazo, kezka eta antzeko kontuen berri ematea; eta orijinaltasuna eta estilo dotorea izatea.
Hona hemen irabazleek jasoko dituzten sariak –sei parte-hartzaile baino gutxiago aurkeztuz gero erdia jasoko dute–: lehenengo saria, 200 euro; bigarrena, 100 euro; eta hirugarrena, 50 euro. Parte-hartzaile guztiek, gainera, diploma jasoko dute.