Akordeoi Orkestrako 18 akordeoilari, bi perkusio-jole, zuzendaria, presidentea eta bost senitarteko joango dira Mexikoko hiriburura. Kide gazteenak 16 urte ditu, eta zaharrenak, 26. Urriaren 31n abiatu eta 14an izango dira etxean bueltan. Mexikoko Euskal Etxean eta hango unibertsitatean joko dute, eta baita hiriburu inguruko Queretaro eta Valle del Bravo hirietan ere.
Orain hiru urte izan ziren orkestrakoak Mexikon; hango Euskal Etxekoei gustatu egin zitzaien emanaldia, eta aurten, gonbidatu egin dituzte. Denetarik joko dute: euskal eta mexikar musika, klasikoa, eliza doinuak, zarzuelak…