Aldaketok Estatu Fondoko dirulaguntzarekin egingo ditu Ingurumen Sailak, hain zuzen 54.288 euro eman ditu Espainiako gobernuak horretarako. Eta Udalak Electricidad Aranzabal enpresari agindu dizkio lanok.
Farolak herriko hainbat gunetan aldatuko dituzte. Hona: bidegorrian –Kurtzebarri eskolatik kanposantuko bidera bitartean–, kanposantu inguruan, Bedarreta auzoan, Santa Kurtz kaletik saihesbiderako irteeran, Lausitta kalean, Geltoki plazan eta Gipuzkoa plazan. 150 farola aldatu arren oraindik beste 80 inguru geratuko dira aldatzeko; horiek datorren urterako utzi dituzte.
Zerurantz argirik ez
Hirigintza Saileko arduradunek adierazi digute energiari dagokionean aldaketa garrantzitsua dela: "Lanparak botatzen duen argiaren fluxua barruan dagoen erreflektore edo islatzaile baten bitartez hazi egiten da; horregatik, vatio berdinak dituzten lanparek intentsitate handiagoarekin argitzen dute".
Argindarraren kutsadurari dagokionean zera argitu dute teknikariek: "Lanpara berrien hego hemisferioa opakoa da, hortaz, argia beherantz eta alboetarantz banatzen da, behar den lekura hain zuzen". Hala, zerurantz ez doa argirik eta kutsadura murriztu egiten da.
Jarriko dituzten polikarbonatu zuriz egindako farola horiek bezalakoak dagoeneko badaude herriko txoko batzuetan: Lausitta kalean Deba ibaiaren alboan eta Urats Gain zaharren egoitzako lorategi aurrean. Eta etxe berriak egiten dabiltzan tokietan ere halakoak jarriko dituzte.