Iaz baino bi milioi euro gutxiago aurreikusi dute, aurten diru gutxiago jasoko duelako Udalak etxebizitzen lanen zergetatik. Aurrekontuaren %35, lau milioi inguru, inbertsioak egiteko izango da. Inbertsio aipagarrienen artean daude Herriko Plazako eta Mitarte kaleko ur saneamendu lanak egitea eta kirol etxe berriaren lanak hastea, milioi bana eurorekin; ondoren datoz, lur sailak erostea (500.000 euro) eta herriko lokal bat erostea (355.000 euro).
Aurrekontuak Aralar, EA eta Ezker Batua-Berdeen aldeko botoa jaso zuen –PSE-EEko zinegotzi biek ez zuten etortzerik izan–. EAJko zinegotziak abstenitu egin ziren: "EAJk egindako proposamen garrantzitsuenak ez dira jaso, txikienak bakarrik. Gainera, adoste prozesua oso informala izan da eta epe motza egon da; beste patxada bat behar du aurrekontuak", azaldu zuen Arritxu Oliden zinegotziak.