Martitzenean ziren hastekoak marra gorria margotzen, baina euria iragarrita zegoela eta itxarotea erabaki zuten margolariek. Hori bai, egun batetik bestera hasiko dira lanean.
CVL eta Eskoriatzara bidean dagoen tunelaren arteko bi kilometroen lanak Udalak beregain hartu zituen, eta Hirigintza sailean egin zuten proiektua. Lehengo trenbidearen ibilbidea errespetatuko dute, eta oinezkoek eta bizikletek izango dute lekua bizikleten ibilbidearen zabalera 1,60 metrokoa izango da. Hala ere, tarte batzuk nahiko estuak dira eta horietan batera ibili beharko dute.
Bidegorriaren zati batzuk margotu eta txukundu bakarrik egingo dituzte, baina Copreci lantegi paretik tunelera bitartean lan handiagoa izango dute konpontzen. Hiru hilabete inguru iraungo dute, eta 193 mila euroko aurrekontua daukate.
Udalak lanok eginda ere bidegorriaren zati bi konpondu barik geratuko dira momentuz: Arrasate eta CVL lantegia artekoa eta tuneletik Eskoriatzarainokoa. Horiek Aldundiko Ingurumen sailaren eskuetan daude, eta 2007an hasiko dituzte.