Hitzordu garrantzitsua dute Errasti anaiek domekan. Batetik, senior mailako finala arrasatearren aurka, eta bestetik, urrezko intsignia jasoko dute UDAren eskutik.
Hamar urtetik gora lanean
Aretxabaleta Kirol Elkarteak jarriko dizkie urrezko intsigniak Errasti aita-semeei. 10 urtetik gora egin dituztelako senior mailan jokatzen jasoko dute Unai eta Ibon Errastik. Juan Mari, aitak, bestalde, 25 urte baino gehiago daramatza UDAko pilota sailean lanean. Hori guztia eskertu gura diete, eta orain arte futboleko preferenteko taldekideekin egindako moduan jokatu: "Pilota taldearekin zorretan geunden eta Debarroko txapelketaren finala aprobetxatuko dugu merezitako omenalditxoa eskaintzeko", dio UDAko presidente den Jokin Antxiak. Pilota taldean lan handia egin duen beste kide bat Joxe San Migel da, azken 17 urteotan pilotarien arduraduna. Andramaixetan, abuztuaren 16an, jarriko diote urrezko intsignia honi.
Gainera, domekan, Debarroko txapelketako senior mailako finala jokatuko dute Errasti anaiek. Zortzigarren finala izango dute, eta arrasatearrei irabaziz gero seigarren txapela eskuratuko lukete.