Euskaldun zaharrak eta berriak harremanetan jarriko ditu Barriketan proiektuak. Helburua da euskara ikasleek zein euskaraz jakinda berba egiteko ohiturarik ez dutenek, euskaraz berba egiteko ohitura dutenekin jardutea. Horretarako, Barriketalagun taldeak sortuko dituzte, hau da, euskaldun zahar batek eta berba egiteko nahikoa maila duten bi euskaldun berrik osatutako taldetxoa. Eta hirukoteari eskatuko diote gutxienez astean behin elkartzea, gura duten egun, ordu eta lekuan euskaraz berba egiteko. Loramendi EEko bazkideei, gurasoei eta herritarrei egin diete Barriketalagun izateko gonbidapena egitasmoaren sortzaileek. Ekainaren hasieran bidali zituzten gutunok ikastetxeen bitartez gurasoei eta Loramendiko bazkideei zuzenean. Euskaldun berriengana iristeko, ostera, Udal euskaltegira jo dute, eta azken zortzi urteotan ibilitako goi urratsetako ikasleei eskaini diete proiektuan parte-hartzea.
Ekain hasieran bidalitako gonbidapenei hasi dira erantzuna ematen. Dagoeneko hamaika bat euskaldun berri edo euskaraz egiteko ohitura ez dutenak gertu egongo lirateke egitasmoan hasteko. Horientzat baina, euskaldun zaharrak behar dituzte, hau da, euskaraz bizi direnak. Antolatzaileek argi utzi gura dute edozein izan daitekeela: etxekoandre, erretiratu, guraso, ikasle Eta konpromisoa ez da handia, gutxienez astean behin elkartzea euskaraz jarduteko. Batzuk kafea hartzera joango dira, beste batzuk paseatzera ume eta guzti, eta zergatik ez, bizikletan edo patinekin ibiltzera ere joan daitezke euskara lagun dutela.