Alkateak adierazi du berea dela erabakiaren erantzukizuna Aretxabaletako EAJko buru izanda. Bidaltzearen arrazoia da "egoera egonezina da Gobernu batzordean eta ezin da jasan". Eta egoera jasanezina jarrera pertsonalek sortu dutela argitu zuen.
Legegintzaldi hasieran hirukotea osatu zutenean gogoz ekin ziotela lanari adierazi zuen Arritxuk, baina gero ez dutela funtzionatu Gobernu talde gisa, eta "Xabierrek partikularki jolastu du interes batzuengatik edo", gaineratu zuen.
Dena dela, aurrerantzean ere bakarrik geratu barik elkarlanean jarraitzea gura du: "Ezker Batuarekin eta batez ere Aralarrekin lanean jarraitu gurako genuke Gobernuan bertan". Eta horregatik Aralarreko beste kide bat sar daitekeela esan zion Sarasuari.
Aralarren erantzuna
Eguazteneko prentsaurrekoan Sarasuarekin batera eta babesa ematen alderdiko hainbat kide elkartu ziren. Erabakiaren zergatia ez dutela ulertzen adieraziz hasi zuten, hainbat interes egon daitezkeela atzean. Aralarko kideek argi utzi gura izan zuten lan taldean egiten dutela lan, hortaz, "ordezkari bat Gobernutik botatzea erabaki badu, Aralar taldea bota duela ulertzen dugu".
Udalean egin duten lanari EAJk eman dion ordaina dela esan zuten prentsaurrekoan. Eta lanaren jardunaz legegintzaldian lortu gura izan dituzten zenbait kontu aipatu zituzten, "Udalean haiek baino gehiago eragin dugu", esanaz.