Joxe Mari Anduagak emanaldia eskainiko die aretxabaletarrei eguaztenean. Abestu eta gitarra akustikoa jotzen ditu Joxe Marik, baina beste hiru kidek egingo diote lagun Bizitza bera emanaldian: Juanjo Uncilla, hau ere oñatiarra eta gitarra eta baxua jotzen dituena, Itziar Lertxundi txeloarekin jarduten duena eta Igor Sala perkusioaren eta akordeoiaren arduraduna.
Musikaren alorrean lan asko egindakoa da kantari oñatiarra: Oñatiko musika eskolako gitarra arloaren sortzailea, Oñatiko abesbatzako kide ohia, Madina laukoteko kide ohia, eta Alai taldeko abeslari eta gitarra-jolea izan zen. Azken aldian bakarlari gisa dabil eta 2003an lehen diskoa grabatu zuen.