Kirol etxeko edozein jardueretan dabiltzan kirolariek zein interesa duten herritarrek eman dezakete izena. Badminton, hockey eta herri kirolak egingo dituzte apirilaren 1ean, 10:00etan hasita, kirol etxean. Bixen Calzon arduradunaren esanetan helburua da ondo pasatzea, inor ez delako aparteko kirolaria aipatutako kiroletan.
Goiza kirola egiten pasatu ondoren, Hernaniko Sarasola sagardotegira joango dira bazkaltzera. Hona menua: txorizoa eta odolostea, bakailao tortilla, bakailaoa piperrekin, txuleta eta gazta eta intxaurrak; guztia sagardo goxoak bustita. 50 euro balio du irteerak eta izena ematerakoan ordaindu behar da kirol etxeko harreran, hau da, martxoaren 23rako. Sagardotegira joan gura ez duenak olinpiadetan parte hartzeko aukera izango du. Horiek 5 euro ordaindu beharko dute.