Pozik azaldu zen UDAko zuzendaritza batzordea pasatako denboraldiarekin. Futbolean talde guztiek mantendu dute maila, pilotan emaitza onak izan dituzte orokorrean, txirrindularitzari dagokionean lau lasterketa antolatzen dute eta mendiaren kasuan Leixargarateko txabola konpontzen hasi dira.
Proposamen berriak
Datorren denboraldiari begira hainbat proposamen aurkeztu zituzten. Futbolari dagokionean, bigarren erregionaleko taldea sortu gura dute, eta areto futbolean senior mailako taldea. Urri aldera montanbike proba antolatzeko asmoa azaldu zuten, eta Elizabarriko iturria konpontzeko nahia. Pilotari dagokionean Deba Arroko Txapelketa antolatzea tokatzen zaie datorren urtean, eta karatean 24 neska-mutiko arituko dira. Gure erronka nagusiena, baina, elkarteari egonkortasuna ematea izango da, esan zuen Jokin Antxia presidenteak.