UDA elkarteko txirrindularitza sailak antolatuta eta elurrak eragozten ez badu trialsin proba egingo dute domeka goizean herrian.
Aretxabaletarrak eta kanpotarrak
Hirugarren aldiz antolatuko dute Aretxabaletan Gipuzkoako Txapelketako proba bat. Kanposantu inguruan eta Santa Kurtz kalean jarriko dituzte ibilbideak, eta 10:30ean hasiko da proba. Izena aurrez eman behar da, eta parte hartu gura duenari antolatzaileek bizikletak eta kaskoak utziko dizkiete.
Hainbat aretxabaletar dabiltza Gipuzkoako Txapelketa jokatzen, eta domekan ere proba polita egiten saiatuko dira. Benjaminak dira txikienak, eta Unai Zunzunegi, Iker Mendikute eta Itziar Murua dabiltza. Alebinetan Aitor Murua dabil, eta infantiletan Markel Uriarte. Ez junior mailan, ez superclass mailan ez dabil aretxabaletarrik. Neskei dagokionez Nagore Uriarte eta Oihana Aldai daude.
Aretxabaletarrez gain, kanpotik ere hainbat neska-mutiko etorriko dira, tartean munduko txapeldun izandakoak: superclass mailan Iker Lezeta, Benito Ros eta Diego Barrio; infantil mailan Jon Areitio eta Abel Mustieles, eta nesken mailan munduko onenak, Kataluniako Avant ahizpak.