Beroa lantegia zegoen gunean etxebizitzak egiten ari dira. Zein izen jarri etxe horiek bilduko dituen kaleari? Beroa kalea? Laster etxeak egingo dituzte kirol etxean hasi eta Lausitaraino. Brues eraikuntza enpresak, Eguzkienea deitzen dio gune horri, baina Udalari dagokio kaleen izenak erabakitzea.
Eguzkienea, beraz, Brues enpresak jarritako izena da, baina gerta daiteke herritarrak izen hori erabiltzen hasi eta ohikoa bihurtzea. Hori baino lehenago, baina, Beroako etxebizitzei zein izen jarri erabaki beharko dute zinegotziek osoko bilkuran. Duela urte batzuk, Ilargi lantegia zegoen orubean etxeak egin, eta Ilargi Plaza izena jarri zioten kaleari. Ikusi egin behar, oraingo honetan ere lantegiaren izena hartzen ote duten irizpide gisa, edo toponimiara jotzen duten.