Mendeurrena ospatzen hasiko da agustindar elkartea

Aurten 100 urte bete dituzte agustindar mojek Aretxabaletan. Orain arte ez dute inolako ekitaldirik egin, eta zapatuan, apirilak 24, hasiko dira ospatzen. Loiuko agustindarren ikastetxeko abesbatzak emanaldia eskainiko du komentuan, 18:00etan.

Otsailean bete zuen agustindar elkarteak 100 urte Aretxabaletan, otsailaren 9an, hain zuzen. Arrasatetik etorri zen elkartea, 16 mojak osatzen zuten elkartea. Otalora bainuetxea erosi zuten lursail eta guzti 75 mila pezeta ordainduta, eta bertan izan zuten egoitza urte askoan. 1957an eskolak ematen hasi ziren herriko neska-mutikoei, eta ia 50 urte pasatu ostean, aurtengo ikasturtea izango dute azkena.

Otsailean ez zuten mendeurrenaren inguruko ospakizun berezirik egin, baina urteurrenak merezi duela ikusita hainbat ekitaldi egingo dituzte; lehena bihar, zapatua, izango dute.

Loiuko Eskolako abesbatza

Mendeurrena ospatzen hasteko Loiuko agustindarren Andres de Urdaneta ikastetxeko abesbatzaren emanaldia izango dute. 9 eta 13 urte bitarteko haur eta gaztetxoek osatzen dute abesbatza. Zuzendaria Montserrat Santaren da, Portugaleteko Santa Klara musika eskolako irakaslea eta koordinatzailea Carlos Santaliestra agustindarra eta ikastetxeko irakaslea. Urtean zehar musika ekitaldi askotan hartu dute parte: Valentzian, Zaragozan, Bilboko Arriaga antzokian, baita nazioarteko emanaldietan ere. Egitaraua aldatzen eta egokitzen joan dira azken urteotan, eta hainbat hizkuntzatan abesten dute: euskaraz, italieraz, ingelesez, afrikar hizkuntzetan…

Zalantza barik emanaldi polita eskainiko dute aipatutako abeslariek bihar, zapatua, 18:00etan, agustindarren komentuan.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.