Istanbuletik gertu dagoen Gebze herria aukeratu du Copreci kooperatibak nazioarteko zabalkundean pausu berri bat emateko. Han ireki du, hain justu, abenduan lanean hasiko den lantokia. Copreciren helburua da Turkiako merkatua hornitzea eta bide batez salmentak handitzeko bezero berriak egitea. Copreciko arduradunek hasieran 2,5 milioi euro baino gehiago inbertitzeko asmoa daukate. Zehaztu duten urteko fakturazioa, berriz, lau milioi eurokoa da.
Coprecik etxetresna elektrikoen osagaiak egiten ditu eta gas bidezko egosketa negozioan Europako eta munduko liderra da. Urtero 150 milioi euro fakturatzen ditu eta salmentetatik %75 nazioartean egiten du. Kooperatibako arduradunek duela urte batzuk nazioartean zabaltzeko apustu garbia egin zuten, eta beharrezko plan estrategikoak burutu eta gero, mundu zabalean hainbat lantoki zabaldu zituzten. Orain arte, Mexikon, Txekiar Errepublikan, Brasilen eta Italian kokatu ditu lantokiak. Laster batean, baina, 2004an hain justu, Txinan ere egoitza irekiko dute.