Jaiei hasiera emango diete gaur, egubakoitza, 19:00etan, ikurrinaren igoerarekin eta etxafuegoekin. 21:00etan, berriz, bertso afaria izango da, Bittor Altube eta Aitor Tatiegi bertsolariekin eta Danel Herrarte gai-jartzailearekin. Afalostean, opari ezkutuaren zozketa egingo dute, eta, bertsolarien desafioaren arabera, bertso-kanpaiak izango dira ordu-txikitan.
Bihar, zapatua, 09:30ean, kanpai errepikak izango dira, eta 12:00etan, auzoan hildakoen aldeko meza. Arratsaldean, 16:45ean, mus txapelketa egingo dute, eta 17:00etan, neska-mutilentzako puzgarriak eta jolasak izango dira. Gauean, 22:30ean, musika izango da, eta 23:00etan, bolo txapelketa irekia.
Domekan, berriz, 10:00etan kanpai errepikak eta etxafuegoak izango dira. 12:00etan, San Migel meza egingo dute, eta 12:45ean, jubilatuentzako luntxa izango da, trikitilariek alaituta. 13:00etan, herri bolo txapelketa jokatuko dute.
Domeka arratsaldean ere izango da zertaz gozatu: 16:45ean, briska txapelketa; 17:00etan, umeentzako puzgarriak eta ohe elastikoa; 17:30ean, txokolatada; eta 18:15ean, gazte bolo txapelketa. 19:00etan emango diete amaiera San Migel jaiei.