Arabako Bertsolari Txapelketako finala jokatu zen atzo, zapatua, Gasteizko Europa Biltzar Jauregian. Peru eta Martin Abarrategi anaia aramaioarrak izan ziren bertan kantuan, eta hauekin batera, Aroa Arrizubieta, Unai Anda, Maddi Agirre eta Iñaki Viñaspre. Azken honek jantzi zuen txapela, 1141 puntu eskuratuta.
Umorez hasi zuten saioa Aramaioko bi bertsolariek. Zozketak hala erabakita Martin izan zen lehena agurra kantatzen, eta finaleko sarreraren diruarekin egin daitezkeen gauzak zerrendatu zituen, lagunek finala amortizatzeko asmoa zuela aitortuaz: "ta ea gero sarrerarik / amortizatu nezaken". Bide beretik hasi zuen saioa Peruk: "Hustu duzue kartera / ta aretoa bete da".
Egia zen Peruk agurreko lehen puntu horietan esandakoa; lepo beteta ageri zen Europa Biltzar Jauregia. Osotara, 800 bertsozale elkartu ziren sei bertsolarien lanak entzuteko asmoz.
Denerako tartea
Emozioz betetako saioa izan zen atzokoa, eta denerako tartea izan zen oholtza gainean. Zortziko handia ezaugarritzen duten gai serioagoekin hasi zen saioa. Bi nekazariren paperetik hasi zuten saioa, esaterako, Martinek eta Agirrek, lehen sektoreko langileek dituzten erronka eta arazoak jorratuz. Peruk berriz, eskolan martxoak 3ko sarraskiaren berri izan ostean, elkarteari idaztea pentsatu duen nerabearen paperetik kantatu zuen, Viñasprerekin batera.
Ez zen sarraskia aipatuko zen azken aldia. Martxoak 3 Elkarteko kideek txapela janzteko ardura izango zutenez, oso presente izan zen saio osoan zehar. Martinek, esaterako, puntu erantzunetan jorratu zuen gaia.
Umoreak ere izan zuen bere tartetxoa. Aspektu horretan bereziki aipagarria da Martinek txapeldunarekin hamarreko txikian osatutako ofizioa. Epaitegi bateko bi boligraforen paperetik kantatu zuten; Iñakik ezkontzak sinatzen zituen, eta Martinek dibortzioak.
Lehen final polita
Lehen finala zuen Martinek. 710 puntu eskuratuta azken postuan gelditu zen arren, final oso polita osatu zuen Abarrategi gazteak. Pozik agertu zen oholtza gainean egindakoarekin: "Momentuak egon dira, batzuetan beste batzuetan baino urduriago egon naiz, baina orokorrean esango nuke oholtza gainean disfrutatzeko gai izan naizela, eta alde horretatik poz-pozik nago".
Euskal Herriko Bertsolari Txapelketara bidean
Saio oso txukun bat eginda, hirugarren postua eskuratu zuen Peru Abarrategik, 749,5 puntu eskuratuta. Horrenbestez, Euskal Herriko txapelketan izango da kantuan. Zer hobetuak ikusi arren, Abarrategi nagusia ere gustura agertu zen saioarekin: "Gustura gelditzen naiz orokorrean egindako saioarekin. Argi dago badagoela zer hobetua, baina ez noa horretan trabatuta gelditzera, beraz gustura, egindako lanarekin gustura". Horrenbestez, bi debagoiendar izango dira Euskal Herriko txapelketan: Peru Abarrategi aramaioarra eta Maider Arregi oñatiarra.
Momentu hunkigarriak oholtza gainean
Aurrez aipatutako umore eta seriotasun puntuez gain, momentu hunkigarriak izan ziren oholtza gainean. Horietako bik, hain zuzen, bi anaia aramaioarrak izan zituzten protagonista gisara, bukaerako agurretan. Familia izan zuten gogoan, eta bereziki, 2023an zendu zen aita, Txema Abarrategi. Malkoei eutsi nahian gelditu zen Europa Biltzar Jauregia. Besarkada batekin borobildu zuten bi anaiek une zirraragarria.
"Egoera makur samarrak bizi izan ditugu etxean. Herrian ere egoera beretik pasatu diren lagun asko ditugu, eta horri eskainia zen azken agurra. Etxekoak beti presente, eta eskerrak hor dauden" azaldu zuen Peruk saioaren ostean. "Ez da ohikoena jende aurrean norbera biluztea, eta sarritan ez dut izan aitari kantatzeko aukera. Gaur horretarako aprobetxatu nahi nuen nire momentutxoa. Ni ere hunkituta egon naiz, eta pozten naiz gustukoa izan bada", gaineratu du Martinek. Bi agurrak ikusgai daude albiste honetan bertan.
Azken une hunkigarria Viñasprek txapela jantzi zuen unea izan zen. Martxoak 3 elkarteak jarri zion txapela, eta belaunaldi ezberdinetako bi pertsonek izan zuten horren ardura: Santiago Diaz de Espada eta Nura Elorriaga. Luze jo zuen txalo zaparradak, eta hau apaltzen zebilela zirudienean, ikusleak zutik jarri eta beste hainbat minutuz luzatu zen, saio amaitzeko irudi benetan hunkigarria utziz.
Sailkapena
1. Iñaki Viñaspre Simon. 1.141 puntu.
2. Unai Anda Delika. 1.124,5 puntu.
3. Peru Abarrategi Sarrionandia. 749,5 puntu.
4. Aroa Arrezubieta Barredo. 749 puntu.
5. Maddi Agirre Epelde. 740,5 puntu.
6. Martin Abarrategi Sarrionandia. 710 puntu.