Papargorri haurren abesbatzak parte hartuko du domekan, hilaren 15ean, Gasteizko Santa Maria katedralean egingo den 34. Haur Abesbatzen Egunean. 18:30ean hasiko den kontzertua Arabatxok, Arabako Haur Abesbatzen Federazioak, antolatu du, eta Lurraren zaindariak izenburua dauka.
Emanaldian Arabako hainbat haur abesbatzatako kideak elkartuko dira; guztira ehun umetik gora izango dira oholtzan. Aramaioko taldearekin batera, Lumturi, Kantabil, Luis Aranburu musika eskolako haur-eskolania, Urkide, Olabide Goiko taldea, Olabide Txiki eta Luis Aranburu musika eskolako eskolania izango dira.
Lehen aldiz Santa Marian
Aurtengoak badu berezitasun bat: kontzertua Gasteizko Santa Maria katedralean egingo da, eta Papargorriko kideentzat lehen aldia izango da han kantatzen dutena. Arabatxo federazioak urtero antolatzen dituen topaketek helburu nagusi bat dute: abesbatzetako umeek elkar ezagutzea eta esperientzia partekatzea. Aramaioko taldea da Gasteiztik kanpoko bakarra, eta hauxe dio Papargorriko zuzendari Larraitz Arriolabengoak: "Helburua izaten da umeek elkar ezagutzea, eta Papargorriri horrelako gauzek ematen digute proiektu handiagoetan parte hartzeko aukera. Leku berezia da, eta kontzertua, gainera, oso ondo dago planteatuta; izugarria izango da".
Egonaldia Barrian
Kontzertua prestatzeko, parte-hartzaileak otsaileko azken asteburuan elkartu ziren Barrian egindako egonaldian. Zapatu goizetik domeka eguerdira arte aritu ziren entseguetan eta elkarrekin lanean. Papargorriko kideak ere bertan izan ziren, Arriolabengoa eta Eneritz Kortabarria irakasleekin batera. Gainera, bi zuzendari gonbidatu ere izan ziren: Ester Bonal kataluniarra eta Amaia Aldalur Gipuzkoako Abesbatza Federazioko presidentea.
Horrelako topaketek umeentzat duten garrantzia azpimarratu du Arriolabengoak: "Gure umeak ohituta daude Aramaion, zirkulu txikian, mugitzera, eta horrelako gauzak onak izaten dira. Haien erosotasun-eremutik ateratzen ditugu eta beste errealitate batzuk ikusten dituzte; oso positiboa da".
Natura eta mitologia ardatz
Kontzertuaren errepertorioa naturaren zaintzaren inguruan eraiki dute. Abestien artean poemak egongo dira eta euskal mitologiako izakiak agertuko dira; adibidez, iratxoak. Eta umeek naturarekin lotutako jantziak eramango dituzte. "Naturaren koloreekin joango dira eta hosto-koroa bat eramango dute, esaterako", azaldu du zuzendariak. Programan hainbat obra izango dira; tartean, Josu Elberdinen Mare Nostrum.
Sarrera doakoa da, baina gonbidapenarekin joan beharko da; parte-hartzaile bakoitzari bi gonbidapen eman dizkiote.