Hasita daude dagoeneko Aramaioko San Martin jai nagusiak antolatzeko bilerekin eta horietako batean proposatu zen herrian danborrada berreskuratzea. Hori antolatzeko, baina, beste lan-talde bat egin nahi dute, eta danborrada antolatzen hasteko lehenengo bilera deitu dute eguaztenerako, hilaren 11rako, osoko bilkuren aretoan, 17:00etan.
Jaietako inkestaren emaitzak
Bestetik, jaietako inkesta betetzeko aukera ere izan dute herritarrek eta udaletik jakinarazi dute 24 lagunek erantzun dutela.
2026ko programan bi aldaketa nagusi proposatu dituzte; alde batetik, egun bakarrean kontzertuak ekartzearen galdera egin zuten, hau da, egubakoitzean kontzertuak eta zapatuan erromeria. Hamazazpi lagunek baiezkoa eman zioten proposamen horri.
Bestetik, danborradagatik ere galdetu zuten; zazpi pertsona parte hartzearen aldekoak izan ziren, esaterako, eta proposamena da danborrada astelehenean egitea, afariaren aurretik.