Arratsaldean mozorro lehiaketa egin dute, epaimahaiak erabakita, helduen mailan Albiña D’Or izan da irabazlea; bigarren saria, berriz, Freddy Mercury eta Montserrat Caballé mozorroek eskuratu dute, ikusleen txalo artean. Originaltasun saria Eskerrik asko, sagardoari proposamenak jaso du. Umeen kategorian, Aramaioko gondola irabazi du lehen saria, eta Loteria mozorroak eskuratu du bigarrena.
Sari banaketaren ondoren, festak aurrera jarraitu du. DJen musika lagun, herritar asko animatu dira dantzara, eta jai giroan, algarak eta koloreak nagusitu dira. Eguraldiak kalejira zapuztu badu ere, Aratusteek ez dute indarrik galdu, eta frontoian elkartuta ospatu dute jaia aramaioarrek.