Aramaioarrendako hitzordu garrantzitsuenetako bat izaten da Santa Ageda batzea, eta aurten, urtarrilaren 31n aterako dira kale eta auzoetan abestera, Papargorrik, Alaiak Kantuan, Trikitixa Elkarteak eta Aramaioko bertso eskolak antolatuta. Goizeko hamarretan elkartuko dira, plazan, eta bi taldetan banatuta egingo dute ibilbidea. Alabaina, urtarrilaren 22an eta 29an egingo dituzte kalera atera aurretiko entseguak, 19:00etan, musika etxean.
Urtero bezala, Santa Ageda eskearen ostean, bazkaria egingo dute, 14:00etan, Iturrieta sagardotegian. 60 lagunendako lekua zegoen, eta, izen-ematea hilaren 26an amaitzen bazen ere, antolatzaileek adierazi dute "sekulako martxan" bete dela bazkarirako izen ematea, eta, printzipioz, ez dute aurreikusten kopurua igotzerik: "Kontrakorik bada, jakinaraziko da".