Maider Unda Pilotalekuen garbiketa eta kudeaketaren eta Txatxilipurdiri esleitutako kontratu txikiak "kontratu zatikatzeak" direla irizten dio EAJk. Zenbait udal eraikinen mantenurako pertsona bakarrari hiru kontratu txiki egin izana salatu du EAJk; baita Txatxilipurdiri gai bereko hainbat kontratu egitea ere. Horregatik, txostenak egiteko eskatu dute kontratu zatikatzea ematen den ala ez ikusteko. "Kontratazio eredu bat ari gara jarraitzen, eta sekulako arazoak ari dira sortzen. Ez dugu uste hau kudeaketa egiteko eredua denik. Modu prekarioan ematen zazikie zerbitzuak herritarrei, eta modu prekario batean daude langileak", zioen EAJko Jonatan Morenok, udal eraikinen mantenuaren harira.
Bestalde, mahai gainean jarri dute kultur zerbitzuak eta kaleen garbiketa eta mantenua "beste modu batera" kudeatu behar dela, eta horren aurrean, Asier Agirre alkateak adierazi zuen urtebete inguru daramatzatela udal brigada bat sortu nahian: "Arabako Foru Aldundiak gomendatu digu ez hasteko beste lanpostu batzuk sortzen, ditugun epaiketak bukatu arte. Egin nahi dugun apustua da hiru urteko plan bat egitea, hiru lanpostu inguruekin beharrei erantzuteko. Zerbitzuetarako ez dago enpresarik inguruan, eta daudenek arazoak dituzte langileak bilatzeko. Hiru urte pasatakoan, OPE bat sortu dezakezu. Gure nahia herriko brigada sortzea da, eta ezin bada, epe luzerako plegua ateratzea, baina horretarako, baliabide ekonomikoak bermatu egin behar dira".
Euskararen Egunaren aldeko adierazpena onartuta
Bestalde, Euskararen Egunaren aldeko adierazpena onartu zuten aho batez. Eusko Jaurlartizak, hiru aldundiek, Eudelek eta UEMAk adostutako adierazpen instituzionala izan zen onartu zutena, eta jasotzen du besteak beste, "euskararen erabilerarako eta transmisiorako bide berriak jorratzeko unea" dela: "Aisialditik lan munduraino, eta norbanakotik erakundeetaraino, euskaraz hitz egiteko gune erosoak sortzeko unea. Belaunaldi berrien artean euskararen transmisioa indartzeko unea. Euskararen ezagutza zabaltzeko unea. Erabilera sustatuko duten ingurune biziak zaindu eta berriak irabazteko unea. Euskararen biziberritze-prozesuari segurtasuna emateko indarrak biltzeko eta urrats berriak eta ausartak egiteko unea".
Biomasaren proiektuaren esleipena
Bestalde, kultur etxeko eta eskolako biomasa galdararen proiektua Giroa SA enpresari esleituko diote. Ahalik eta azkarren nahi dute esleipena egin, modu horretan, lanak ahalik eta azkarren hasteko: "Gure helburua da lanak bigarren hamabostaldian hastea, eskola hutsik dagoela aprobetxatuz, ahalik eta kalte gutxien egiteko ikasleei".
Galde eta eskaerak
Galde eta eskaereran EAJk proposatu zuen, osoko bilkurak gordeta geratzeko sistema bat jartzea: "Normalean, ez dago arazorik aktekin, baina izan daiteke idazkariarendako errazagoa grabaketa sistemaren bat izatea. Ez dago zertan bideozkoa izan. Agian, aukera ere egon daiteke jendeak plenoa etxetik jarraitzeko". Udal gobenua gaia aztertzekotan geratu da.