Haziaraba jaialdiak Aramaion egingo du geldialdia, beste urte batez, eta, guztira, hiru ekitaldi hartuko ditu, domeka honetan eta hurrengo asteburu osoan. Emanaldi guztiak kultur etxean izango dira, 17:00etan. Ez da aldez aurretik izenik eman behar, baina bete arteko edukiera du.
Azaroaren 23an, Arabazan Elkarteko Odei Arregiren Kamaleoiaren azala ipuin-kontaketaz gozatu ahal izango dute 2 eta 6 urte bitarteko haurrek. 45 minutu iraungo du ikuskizunak.
Hilaren 29an, Txintxirrin Dantza Taldeak Ehunak dantza ikuskizuna egingo du, 2 eta 6 urte bitarteko haurrei zuzendutakoa. Gorputzak oihalekin eta airearekin duen mugimenduaren bidez dantza egingo dute 30 minutuan. Ondoren, hurbilketa sentsorialean parte hartu ahal izango dute etxeko txikiek.
Azkenik, hilaren 30ean, Pixkanaka-pixkanaka zinemaren txanda izango da. Euskarara bikoiztutako sei film labur poetiko eta dibertigarri proiektatuko dituzte.