Egubakoitzean Aramaion egindako urteko bigarren Kontseilu Nagusian onartu zuen Udalbiltzak Kudeaketa Plana, eta horren baitan aurkeztu zituzten hainbat proiektu. Adierazi dutenez, duela pare bat urte egituratu zuen Udalbiltzak "lan-eskema berri" bat, eta "ildo ezberdinetatik abiatutako lanaren lurreratzea gertatuko da datorren urtean.
Hainbat proiektu esku artean
Herri jasangarria-ren ildotik, Energia Burujabetzaren atalean, Ehnergia egitasmoa aurkeztu zuten; estatuen mugaz gaindi landuko den Energia Komunitateen bigarren mailako sarea. Aurreratu zuten, ekimena "behar bezala aurkezteko", 2026ko otsailean egingo dutela aurkezpen bat.
Herri zaintzailea eta hezitzailea lan-ildoan, Zaintza liburuxka argitaratuko dute, Eraldaketarako gakoak izenburupean. Azaroaren 7an jardunaldia egingo dute Donostiako Miramon Teknologia Parkean, eta izen-ematea zabalik dago. 2026an aurkeztuko dute liburuxka herri ezberdinetan.
Memoria duen herri euskalduna eta askotarikoa atalean, Geuretik Sortuak kultur egitasmoan jarri zuten arreta. "2025-2026 urteak hartuko dituen hirugarren edizioan, 2026a zehazki zirkuitu nazionalaren urtea izango da". Sormen egonaldietan landutako lanak aurkeztuko dituzte; hala nola, zortzi antzezlan, zazpi komiki bilduma, hamar ipuineko bilduma, eta lau film-labur.
Datorren urteetako ekimenak
Patzuergoak ia 850.000 euroko aurrekontua onartu du, eta beste zenbait egitasmorekin aurrera egiteko ere balioko dutela azaldu zuten. Gobernantza Publiko Komunitarioan aurrera egiteko lantaldea osatu dute. Ekonomia Sozialean, berriz, Gizarte Monetaren proiektua dute, eta Elikadura Burujabetzan, manifestua idatzi eta ekintza plana diseinatuko dute.