Gaur ospatu dute Aramaioko kaleko 34. Margo Lehiaketa. Hiru modalitatetan banatuta egon da lehiaketa. Helduen eta 16 urtetik beherakoen modalitatean parte hartu dutenak, gaur 08:30etik 10:30era bitartean zigilatu behar izan dituzte euskarriak, eta 13:30erako aurkeztu. Aurten, hirugarren modalitate bat egon da lehenengoz, epe luzekoa. Parte-hartzaileek uztailaren 11n zigilatu zituzten euskarriak, eta lanak urriaren 9a baino lehen aurkeztu.
Epaimahaiak lanak baloratu ostean, 15:00etan ekin diote sari banaketari, Sastiñan. Helduen kategorian Oliver Jurado izan da garailea. 16 urtetik beherakoen modalitatean Paule Avila izan da irabazlea. Honen atzetik gelditu dira, hurrenez hurren, Anne Kortabarria eta Peru Errasti. Saririk eskuratu ez arren, Eki Errastiren lana ere aipatu dute epaimahaiko kideek. Azkenik, epe luzeko kategorian Iñaki Nafarrate izan da txapelduna. Honen ostean gelditu dira Edurne Uribarren eta Jesus Mari Ibabe.