Gaur arratsaldean egin du ezohiko osoko bilkura Aramaion eta hainbat jabekideri 14 lursail erostea onartu du Aramaioko udalbatzak. Asier Agirre alkateak adierazi du bi gunetan daudela banatuta partzela guztiak, eta bat izan ezik, gainerakoak baso-lurrak direla. "Helburua da mendi publiko deklaratzea eta taldekatzea mendi horiek herrian dauden beste mendiekin. Besteak beste, bidegorria pasatzeko proiektua dagoelako eta lurrak gure eskutan geratzeko. Bestalde, balio handia dute hango zuhaitzek, eta hori babesteko erosi ditugu. Arabako Foru Aldundiaren %90 bueltako dirulaguntza daukate eta jabe partikularrek guri saldu digute".
Hala, EAJko Jonatan Morenok adierazi du ez duela ulertzen zergatik aurtengo urtarriletik sinatutako transakzioak ekarri diren 10 hilabete ezohiko bilkura batera: "Ez dugu uste oso normala denik". Gainera, azaldu du ez dutela lur-erosketa horiei bueltako informaziorik jaso: "Orain entzun dugu zuen ahoz zertan dantzan, baina horrela erabakiak hartzea ez dut uste erantzukizun aldetik oso ona denik, gure aldetik behintzat. Gure botoa abstentzioa izango da".