Aramaiok ezin izan du Arabako Herriartekoan lehen txapela lortu. Atzo Gasteizko Ogetako frontoian jokatu zituzten finaleko partidak Agurainen kontra. Kadete mailako partidarekin hasi zen finalara, lehen partidan, Ibai Osorok eta Ekain Gonzalezek 7-22 galdu zuten.
Markagailu orokorra 0 eta 1 aurka, gazte mailan, Markel Beitia eta Eñaut Moro sendo agertu ziren, eta 22-11 gailendu ziren Aguraingo bikotearen kontra.
Arabako txapela azken norgehiagokan erabaki zen, eta Aramaioko Asier del Campok eta Markel Arriolabengoak 14-22 galdu zuten. Hortaz, Agurain da Arabako Herriartekoko txapelduna.
Bigarren aldiz jokatu zuen atzo Aramaiok Arabako Herriartekoko finala. Aramaio Pilota Elkartetik adierazi dutenez, 1986an jokatu zuten finala lehenengo aldiz Labastidaren aurka, baina orduan ere azpitxapeldunak izan ziren.