Ikasleak, gurasoak, irakasleak eta irakasle ohiak, 60 lagunen bueltan, elkartu dira, bigarrenez egin duten Berba Puxika egitasmoan. Etxeko txikienen artean irakurzaletasuna eta elkarbizitza sustatzea helburu duen ekimena, eta janaria kontzeptua ardatz hartuta, hainbat liburu aukeratu dituzte ikasleek ikaskideekin partekatzeko.
Aramaixo Herri Eskolan Berba Puxika ekimena egin dute gaur, Haur Hezkuntzako 4 eta 5 urteko eta Lehen Hezkuntzako lehen zikloko ikasleek gurasoek lagunduta. Janaria gai moduan hartuta, partaide bakoitzak gura izan duen liburua aukeratu du, eta ostean, aukeratutako liburuaren pasartea, errezeta, ilustrazioa edota zati bat taldean partekatu dute.
Berba Puxika ekimenaren bigarren aldia izan da, eta irakurzaletasuna eta elkarbizitza bultzatzea du helburu dinamikak: "Asmoa da literaturaz gozatzea, balio positiboak lantzea eta ipuinen inguruan elkarrekin une gozoak bizi izatea".