Bittor Kapanagak euskalgintzari Bagare abestia idaztea baino askoz ekarpen handiagoa egin ziola erakutsi du hirukoteak beso-zabalik hartu duten aramaioarren aurrean. Ordu eta erdiko saioan, otxandiar idazle eta filosofoa nolakoa zen azaldu dute Mendibilek eta Amurizak, eta Sarrionandiak ere haren ilobarekin bizi izandako anekdotak kontatu ditu. Gainera, hainbat paralelismori buruz mintzatu da –hala-nola koloniaren esanahia, euskararen altxor-izaera...–, Kapanagaren pentsamendua oinarri hartuta.
Mendibilek kantu batzuk abestu ditu gitarrarekin, batzuk Kapanagarekin sortutakoak. Amurizak Barajuengo Jose Luis lagunari eskaini dio, asko abesten zuelako, Nando Aguerosen Vientos del Norte kantuaren euskal itzulpena, Amurizak berak itzulitakoa: Ipar-haizeak.
Txalo zaparrada artean bukatu da Aramaioko aurtengo Musika Astearen azken bigarren saioa. Gaur, Itoitz udako sesioak dokumentala proiektatuz borobilduko dute ekimena, 19:00etan, Kultur Etxean.