Zinema-forum emanaldiak antolatzen dituen Ikusiz Gozatu taldea hilabete honetan zinema eta giza eskubideak gaia lantzen dabil, eta, horren baitan, 2021ean ekoiztutako Fadia's tree ikus-entzunezkoa proiektatuko du domekan, jatorrizko bertsioan, euskarazko azpitituluekin. Kultura etxean izango da emanaldia, 19:00etan, doan.
Fadia Libanon geratutako errefuxiatu palestinarra da, eta ukatu egiten zaion antzinako aberria irrikatzen du ikus-entzunezkoan. Erresuma Batuan egindako lana da, Sarah Beddington-en zuzendaritzapean.
Donostiako Giza Eskubideen Zinemaldiaren Amnesty International sariaren film irabazlea izan zen, hain justu, 2022an.
Eta, gainera, domekan Aramaioko kultura etxean 19:00etan egingo den proiekzioaren ondoren, solasaldi bat ere izango da. Amnesty International taldeko Alex Santamaria izango da bertan.
