Duela bi urte antolatu zuen lehenengoz Kintada Eguna, Aramaio Tropikaleko Gazte Asanbladak. Egunaren helburua zen gazteak zein nagusiak, herriko askotariko kintadak elkartzea eta ospakizun egun bat izatea. Orduan, gazteak bakarrik animatu ziren, eta ondorioz, iaz Kintada Eguna ospatu beharrean, Gazte Eguna antolatzeko erabakia hartu zuten. Dena den, aurten bigarrenez Kintada Eguna antolatzeko ardura hartu du Gazte Asanbladak eta bertako kide June Ballesterosek adierazi du bazkarirako 43 lagunek eman dutela izena: "Hainbat kintadatako gazteek eman dute izena eta gogotsu gaude egunerako. Ea datorren urtean nagusiagoak ere animatzen diren, guztiondako jai bat izatea nahi dugulako", esan du.
Egun osoko jaia
Bihar 13:00etan Anbototik hasita, triki-poteoa egingo dute. Bazkaria Bizente Goikoetxea plazan egingo dute eguraldi onarekin. Bestela, frontoian edo udaletxeko arkupetan. Bingoa izango dute gero eta Gantzagako jaietara joango dira ondoren.
