Egun garrantzitsua izaten da jubilatuendako Alaiak Jubilatuen Elkarteko Bazkideen Eguna eta giro onean ospatu zuten atzo, domeka. Meza ostean, Sagardo Egunaren ospakizunekin bat egin zuten lehenengo, eta ondoren, luntxa eta bazkaria izan zituzten.
Bazkarian 63 lagun elkartu ziren, eta bazkalostean, Alaiak Kantuan taldearekin batera, abestu zuten guztiek. Aurtengo berrikuntza izan da orain artean lantalde bat ibili dela kantu liburu bat sortzeko asmotan, eta azkenean, guztira 211 kanturen letrak jaso dituzten eskuliburua estreinatu dute. Gainera, Arabako Foru Aldindiaren diru-laguntzari esker, 100 ale inprimatu dituzte eta Alaiak Kantuan taldeko kideei banatzeaz gain, bazkideek ere eskatu ahal izango dute.
Aurtengo omenduak
Urtero bezala, lau nagusi ere omendu zituzten ospakizunean. Aurten, Justa Repecho, Karmen Astola, Rosita Balanzategi eta Karmen Arrizabalagak jaso dute elkarteko oroigarria.
