Herri mailan martxan jarritako ekimena izan da eta positiboki baloratu dute. 392 sinadura jaso dituzte eta, gaur Aramaioko Lagunkoiak, udal ordezkariek eta beste hainbat herritarrek, denera 18 lagunek, Arrasateko Osakidetzara eraman dituzte sinadurak. Herritarren arreta zerbitzuan sinadurak jaso dituzte eta hurrengo pausoa izango da eskaerei erregistroa ematea. Ondoren, horren ziurtagiria jasoko dute eskaera egin dutenek.
Rosa Mondragon herritarraren esanetan, "ez da erraza", baina herri mugimendua Osakidetzak kontutan har dezan nahi dute. "Ia 400 pertsona mugitzea, kopuru garrantzitsua da. Uste dugu zerbait lortuko dugula", dio Mondragonek. Ane Miren Etxebarria Aramaioko Lagunkoia taldeko kideak gehitu du gutxienez, Osakidetzan jakin dezatela Aramaion osasun-zerbitzua momentu batzuetan eten egiten dela.
Mondragonek dio herritarrak mobilizatu nahi izan dituztela herrian duten osasun-zerbitzuaren egoerari aurre egiteko: "Ekainean gaude eta aurreko urteetan udako zerbitzua gutxienekoa ere ez da izan. Zuzenean, Arrasatera bideratu gaituzte eta nahi duguna da zerbitzu jarraitua izatea Aramaion; bai medikua, baita erizaina ere. Uste dugu gutxieneko zerbitzua badela 1.500 biztanle dituen herri baterako. Hori da eskatzen duguna". Adierazi du ez daukatela erreferentziazko mediku eta erizainik eta galtzen herritarrak ateratzen direla.
