Eibarreko Arrate tiro-eremuan jokatu zen plater tiraketako foso unibertsaleko Euskadiko Txapelketa eta 90 jaurtitzailek hartu zuten parte. Jaurtiketa 75 plateretara izan zen, eta aurreneko 24 sailkatuek beste 25 plater bota behar izan zituzten.
Kurtzeta Gain elkarteko kideek lortu zuten podiumera igotzea. Unai Axpe arrasatearra Lehen Mailako txapelduna izan zen 21/25/25/25 marka eginez. Hirugarren Mailan, berriz, Koldo Jauregi aramaioarra izan zen garaile 21/23/25/21 eginez. Beteranoetan ere, beste aramaioar bat izan zen garaile; hain zuzen ere, Juan Luis Nafarrate, 23/24/22/24 eginez.
Halaber, Laugarren Mailan Oskar Arrizabalaga bigarren sailkatu zen 23/24/19 plater botata, eta Enrike Ullibarriarana seigarrena izan zen beteranoetan 23/20/24 emaitzarekin.
Kurtzeta Gain plater tiraketa elkartetik adierazi dute "maila gorena" eman dutela: "Klubeko kideak oso ondo aritu dira Eibarren. Maila gorena eman dute eta emaitza ezin hobeak izan dira Kurtzeta Gain klubarendako".
