Aramaion ospatuko da Euskal Herriko Alboka Eguna ekainaren 1ean, eta alboka protagonista duen egun osoko egitaraua antolatu du Haizem@n albokari elkarteak 21. ediziorako. Tartean, bazkaria –babajana– egingo dute, 14:30ean, kanpoko frontoi estalian, baina izena eman beharko da astelehena baino lehen –maiatzak 27–. Izena emateko, galdetegia bete edo haizemanalbokarielkartea@gmail.com helbide elektronikora idatzi behar da. Helduendako txartelen prezioa hamar eurokoa da eta haurrena, berriz, bost eurokoa.
Albokarien topaketa herrikoiaren helburu nagusia da albokaren musika nahiz ondarea zabaldu eta indartzea. Antolatzaileek azaldu dute jaialdia erakusleiho "aparta" dela emanaldi tradizionalak zein egungo uztartzeak ikusgai jartzeko.
Egun osoko egitaraua
Eguerdiko hamabietan hasiko da albokarien topaketa eta honako hau da egitaraua:
- 12:00 Kalejira Bizente Goikoetxea plazatik hasita
- 14:30 Bazkaria
- 18:00 Tik-tak Imaginaciones Nai konpainiaren ikuskizuna
- 19:00 Besaide, Ursaria eta Intxixu taldeen kontzertua.
Txosna jarriko dute eta bokatak izango dituzte salgai kanpoko frontoian.
