Autoak herriko espaloi, zebra-bide nahiz debekatutako lekuetan aparkatuta uztea zenbait arazoren sorburu dela dio Aramaioko Udalak eta zenbait adibide jarri ditu: "Hondakinak jasotzeko kamioia pasa ezinda geratzen da batzuetan gaizki aparkatutako autoek nahikoa leku uzten ez dutelako, eta ez hori bakarrik; kontuan hartu behar da, larrialdiren bat sortuko balitz, emergentzietako ibilgailuak ezingo liratekeela bertatik igaro". Nabarmendu dute ibilgailuek pasabidea oztopatzeaz gain, oztopoak eragiten dizkietela ezinduei nahiz oinezkoei ere.
Arrazoi horiengatik Udalak aramaioarrei eskatu die herriko zirkulazio arazoaz kontzientzia hartu eta araudia errespetatzeko.
