Ordubete pasatxoko bertso saioa izan zen eta hogei bat lagunen aurrean egin zuten bertsotan hiru bikotek: Iraide Onaindia-Xabi Antia, Ane Arexolaleiba-Paula Amilburu eta Gari Arexolaleiba-Martin Abarrategi. Nabarmentzekoa da sei bertsolaritik bost izan zirela aramaiorrak, Aramaion jokatutako kanporaketan.
Askotariko ariketak eta gaiak jarri zizkieten bertsolariei. Bakarka, binaka eta hirunaka egin zuten bertsotan. Objektu baten bueltan edota Firts Dates –Lehen Zitak– saioan ere jarri zituzten gai-jartzaileek. Bertso saio umoretsua izan zen eta aukera polita jendaurreko emanaldietan trebatzen ari diren bertsolari gazteendako.
Amilburu eta Arexolaleiba finalera
Publikoak erabaki zuen zein bikote bidali urtarrilaren 26an Gasteizen jokatzekoa den Bertxoko sariketako finalera. Paula Amilburu eta Ane Arexolaleiba sailkatu dira eta sariketako beste bi kanporaketak jokatu bitartean finala prestatzeko aukera izango dute. Hurrengo kanporaketa Baranbioko Garrastatxu elkartean jokatuko da hilaren 14an, eta hirugarrena Aguraingo Latsarri gaztetxean hilaren 19an.
Hala Bedi Irratiak antolatzen du Bertxoko sariketa Arabako Bertsozale elkartearekin elkarlanean. Urte batzuetako etenaldiaren ondoren, bueltan da aurten eta lehen kanporaketaren inguruko balorazio positiboa egin dute Hala Bedi Irratikoek. Saio "ganberroak eta informalak" aurreikusten zituzten, eta lehenengoa horrela joan da.
