Maiatzean egindako udal hauteskundeen emaitzen ondoren, Iban Herrartek hartu zuen udaleko aginte makila ekainean; baina, arrazoi pertsonalak argudiatuta abenduaren 5ean jakinarazi zuen Herrartek alkate kargua utziko zuela; eta astelehenean, abenduaren 18an, eman zien udal idazkariak erabakiaren berri gainerako udal ordezkariei presazko ezohiko bilkuran. Jarduneko alkate kargua Libe Ramilak hartu zuen astelehenean, behin-behinean.
Atzo, eguena, ezohiko osoko bilkura egin zuten alkate berria izendatzeko. Lehenengo, Libe Ramilak uko egin zion astelehenean hartutako behin-behineko alkate karguari, eta ondoren egin zuten bozketa alkate berria izendatzeko. EH Bilduk Asier Agirre aurkeztu zuen eta EAJk, Alberto Amenabar. EH Bilduren botoekin izendatu zuten Agirre alkate. Ondo ezagutzen du kargua Agirrek; 2007tik 2011ra arte izan zen-eta Aramaioko alkate.