Bazkalondoan, ohiturari jarraituz, omenaldi txikia egin diete hainbat bazkideri. Kasu honetan, Jabier Altunak, Rosalia Abarrategik, Purificacion Garaigordobilek eta Enrike Ibabek jaso dute katilu sorta. Kantuan ibili dira uneoro, nekaezin eta umoretsu, halako topaketek behar duten bezala.
Migel Loiti izan da gaurko egitarauaren antolatzaileetako bat, eta, balorazio moduan, aipatu du jendea "oso pozik" ikusi duela, "itxura batean gaztetuta". Iaz Arabako eskualdeen topaketa ospatu zuten Alaiakoek, beste herrietako erretiratuen elkarteekin nahastuta, eta aurten berreskuratu egin nahi izan dute bazkideen eguna. Pandemia aurretik Sagardo Egunarekin batera ospatzen zuten egun hau, baina, aurten, astebete beranduago: "Hala ere, oso egun betea eta goxoa izan da, eguraldia lagun".
