Arabako, Bizkaiko eta Gipuzkoako mugan, hildako mendizaleak oroitzeko ekitaldia egiten dute urtero: Besaide Oroimen Eguna. Bada, aurtengo ekitaldia antolatzeko ardura Aramaioko Orixol Mendizale Elkarteak izango du. Euskal Mendizale Federazioarekin elkarlanean goiz guztiko egitaraua antolatu dute.
Mendizaleak oinez igoko dira Besaidera; han, 10:30ean, txalaparta saioa izango dute. 11:00etan oroimen ekitaldi zibila egingo dute hildako mendizaleen oroimenez, eta 11:30ean Euskal Mendizale Federazioko lehendakariak hartuko du hitza: Zigor Eguiak. 12:00etan dantzariek eta txistulariek girotuko dute Besaide, eta ondoren Alaiak erretiratuen elkarteko abesbatzak abestuko du. Jana eta edana ere egongo da goizean zehar.