Berrikuntza txiki batzuk izan ditu aurtengo ipuin, komiki eta mikroipuin lehiaketak; berrikuntzak edukian eta baita forman ere. Izan ere, gaur egingo duten sari banaketa kanpoaldean egingo dute lehen aldiz. Parkean banatuko dituzte sariak –euria egingo balu, kultura etxeko aretoan–. Edukien kasuan, aldaketa txiki bat izan dute: hirugarren zikloko ikasleek ipuinak idatzi beharrean komikiak sortu dituzte; bigarren zikloko ikasleek banaka sortu dituzte ipuinak; eta LH-1eko eta LH2ko ikasleek taldeka idatzi dituzte ipuinak.
Parte-hartzea, behera
Txirritola Euskara Elkarteko kideek adierazi dute parte-hartzeak behera egin duela: "Eskolako umeen kasuan, eskolarekin elkarlanean egiten dugu, eta denek parte hartzen dute. Eskolan lantzen dituzten ipuinak. Jaitsi dena da herritarren parte-hartzea. Mikroipuinen sailean, nerabeen kategorian bi lan aurkeztu dituzte eta nagusien kategorian bakarra". Hain zuzen, 2021. urteko ekitaldian estreinatu zuten mikroipuinen saila. Helburua zen herritarrak idaztera animatzea. "Ipuin motzak izan behar dute, 100 hitz baino gutxiagokoak", diote antolatzaileek.
